投考見習機師的問與答


間中都會有人問下有關準備考 Cadet Pilot Programme 的問題,與其逐個覆一樣的答案不如寫篇 Q & A,大家可以留言互相交流。做 Sharing 都有遇過有好問題,記得的都同大家分享,參考過可以再問問不同人的意見。另外仲有十萬個令人反白眼反到後腦的問題,例如聽過有人當面問個女機師:「有無女仔做機師?」,在此輯錄俾大家引以為鑑,切勿重蹈覆轍。

*以下為個人意見,並非任何公司 Official 答案*

1) 戴眼鏡可否做機師?
此問題絕對為 FAQ 之最,榮登航空公司的 FAQ 榜首。有睇的話應該知道答案係只要矯正到 Acceptable Vision Standard for a Pilot’s Licence 就可以。如何為之 Acceptable Vision Standard?其實係要由醫生判斷,關乎你能否過到 Medical Check。依然好忐忑咁點算?有無話幾多度就唔得?明嘅,我曾經都有呢個疑問。記得當年未有 FAQ page,好想考但又好擔心有近視點算,我直接 Send Email 俾 CAD 問。我收到的答覆:「問醫生。」 附件香港合資格的 Aviation Medical Examinar List。真係好擔心的話,都係自己去做個 Check 吧!

如果堅持好想係 Career Talk 問的話,千析唔好問戴住眼鏡的機師 OK?

其實有需要戴眼鏡的機師係 on duty 時會帶備後備眼鏡。我自己除了後備眼鏡外,仲有一副配有度數的太陽眼鏡放係 Flight Bag。太陽眼鏡又係另一個被問過的問題,下回分享。

2) 是否需要有一定基礎的航空知識?
作為一個有誠意的求職者,去見任何一份工前都應該稍為認識該份工作的背景與相關知識。但留意你投考的是機師不是工程師,不應過份鑽牛角尖。當然你於某範疇有天分,學多一點亦無妨。

3) 該如何入手溫習?應否報讀課程?
個人覺得 ASA 的 The Pilot's Manual Vol 2: Ground School 係一本非常好的入門書,圖文並荗簡單易明。書中亦另外標明較深的 CPL 程度內容,掌握好基本知識之後可以 再回頭深入了解。另外亦有必讀的 Pilot's Handbook of Aeronautical Knowledge 同 解釋飛行理論非常生動易明的 Boldmethod。不過先旨聲明,每人都有一套自己的學習方法,我覺得好的書或參考資料未必適合你。可以去美麗華商場地庫或東涌的書局去打下書釘,親自找出適合自己的參考書。

之前都有略略寫過幾個短期課程,有時間有經濟能力甚至好彩報得到當然好。但說到底,溫書最終靠的是自己。有,係 Bonus。無,就自己溫囉!身處外國的 Candidates 都無 Course 上架!

4) 年過 25 歲,係咪無機會啦?
(咳)我係年過 25 歲入 Cadet Pilot Programme 架!而且同班同學都有大約一半人年過 25 歲,甚至有人 30 歲。當然我有見過世界上有 Cadet Pilot Programme 有年齡上限 25 歲,不過並非香港的 programme。

我無法拍心口保證年齡並非考慮因素,但希望不要有人僅僅因為年齡問題就直接放棄。成熟穩重都好重要架!



------------------------------

本篇會不定時更新,Like 我個 FB Page 就會知道幾時 Update 左啦!如有問題想問,都可以去 Inbox 問。不過問問題前請自己做好功課先,好有多資料絕對可以輕鬆 Google 到,而且我都會 Expect 你心入面有個答案,我只係幫幫手睇睇有無錯或加以補充。事先聲明,答到會盡答,亦都要得閒先會答。催我都無用架我都要返工架 :)