2019 年尾去日本旅行，當時買口罩盤算兩個人返工有需要先用，諗住一盒就夠，仲要左揀右揀唔係獨立包裝唔要。轉頭踏入 2020 竟然要撲口罩撲消毒清潔用品。稍感安慰係呢個時候朋友之間互相幫大家買物資唔使周圍撲。
然後經歷14日家居隔離，慶幸有 Netflix 煲劇過日晨。 接住開始一段腳踏實地放長假的日子。但其實放假嘅日子都並非日日無所事事，因為終於都等到做 STI 嘅日子！努力温書成功 Pass 咗，不過都要做第 N 次 SO Line Check，然後繼續等 Upgrade Course。
下半年開始飛返，不過就算飛到外地其實都係強制性 Staycation，要乖乖留係酒店。記得第一轉 Layover 留五日，當時覺得係酒店睇 Netflix 上網睇書耍廢好快過。原來隔離嘅孤獨感會累積，慢慢由五日覺得輕鬆變成「三日夠了」，然後係第二日已經係床上耍廢耍到「仲有咩可以做呀？」除咗係外地要 Staycation，返到香港都要去酒店繼續隔離等檢疫結果。
空閒時間多咗，無理由係屋企/酒店耍廢耍到天荒地老，決定要開始一個新嘗試：開 YouTube Channel！拍片剪片嘅技術當然係新手程度有待改進，但寫 Blog 嘅經驗係 Start Messy 好過 Start Late，因為最難嘅永遠係踏出第一步，只要踏出咗第一步就可以繼續進步。2021 其中一個目標係我嘅 Channel 可以有 1000 個 Subscribers！
↓↓↓ 一按訂閱幫我達成願望吧 ↓↓↓
https://www.youtube.com/c/MissPilotsNotebook?sub_confirmation=1
2020 一樣有趣嘅事係同老公一齊提早預演退休生活，幾乎日日都日夜相對都無嗌大交。相信到我哋真係退休嘅時候都唔會有大問題出現啦！
朋友之間都産生咗新嘅相處方法，係無得經常聚會嘅情況下，竟然玩起多人 Video Conference！連除夕都一齊係 Zoom 倒數！
年尾發生一場被撞嘅輕微交通意外，原來危急時眼前事物真係會變得慢動作，當時感覺幾秒嘅事，事後睇返車 Cam 原來係一秒內發生。人無事，不過就要等兩個月先整完車啦。
2020 嘅得著係世事有好多野我哋都無法控制掌握，與其為未來擔憂不如過好眼前嘅日子。無論如何，最重要係平安健康。人無事先可以做到世界冠軍嘛！
No comments
Post a Comment