IG @misspilot.notebook Q&A 有好多人問關於想做機師嘅選科問題。不同航空公司對申請人學歷各有要求，詳情要向相關航空公司查詢。本篇只係分享作為一個中學時期已立志做機師嘅過來人，選科嘅心路歷程同依家嘅感想。
當時對 JUPAS 選科嘅想法：
- 對文/商科無興趣
- 神科一定無我份可以慳返啖氣
- 對理科/工程/社會科學有興趣
作為一個入世未深單純的中學生，我當時覺得同機師最相關嘅係 Mechanical Engineering 同Electronic Engineering。而且如果真係做唔成機師，做工程師都幾好呀。於是將各大學 ME 同 EE 放係最高排名，而我亦得到三大面試機會。面試嘅時候我都有提及我嘅理想，有一位 Professor 提我就算同一個系，唔同大學都有唔同嘅課程，要睇清楚邊間課程係我想要嘅。
最後我無入到任何院校呢兩科，成為左山城另一個工程系嘅學生。本來有點失望，但 Year 1 其中一科必修科係 EE 嘅入門科，發現根本唔係心目中嗰回事！塞翁失馬，焉知非福。事實本科比較適合自己嘅能力同興趣。
其實都有諗過，我成績符合報考 Cadet Pilot Program 嘅最低要求，好唔好直接報考，成功就 Quit U 呢？當時我有一位機長作為我嘅 Mentor，佢嘅意見係公司大部分機師都係大學畢業，而且係讀書學到嘅知識係屬於自己，無人可以拎走，建議我都係 Enjoy 呢幾年大學生活之後再考慮報考嘅事。 於是我疊埋心水繼續我嘅大學生活。
Elective 揀左兩科 Management，遇上一位好好嘅講師。課堂中佢分享左好多佢嘅人生經歷，係佢身上我認識同感受到咩叫 Passion，佢分享嘅 “Hire for Attitude, Train for Skill” 更加係一言驚醒夢中人。今日望望身邊嘅同事，當然有人 Aviation、Aeronautical Engineering 畢業，但亦都有人係 Accounting、Business、Anthropology 畢業，大家本身專業唔同一樣成為機師。
至於本科學到嘅學術知識有無幫助，說實話除左 AND gate / OR gate 同 Amplitude Modulation 之類係大學學過然後考 ATPL 嘅筆試有考過之外，都無乜直接幫助。但係學習過程中，訓練到嘅思考方式、習慣等等，係構成今天的我嘅重要過程。我認為不同專科都有其獨特之處，無論讀邊一科，重要嘅係學習過程中培養出好嘅 Attitude 同 Problem solving skill。
問我選科意見，我傾向建議選讀自己有興趣同有後路嘅科。 「有興趣」係因為無興趣會讀得好辛苦，見過一個對電腦方面好有天分嘅朋友被逼讀 Business，雖然 handle 到但感覺到佢好痛苦唔enjoy。「有後路」係除非你係富二代，否則都要顧及生計。無人保證你一畢業就考到，又或者萬一真係「此路不通」，儲錢自費考牌，又或者從此行過第二條路，都要有路可走。並非一定要揀大眾眼中「錢途無限」嘅科，但起碼係自己將來願意行嘅路。當然世事未必盡如人意，盡量啦。
其實都有同事係中學畢業 18 歲就考入 Cadet Pilot Program，當我仲係一個 SO 嘅年紀就已經成為 Captain！曾經有同事問我有無後悔讀埋大學無早早報名呢？自問當時年少氣盛心智未夠成熟，我都無信心可以成功。而係大學生涯中，除左本科同副修學到嘅知識，我仲遇上不同好有智慧嘅教授、講者，佢哋傳授嘅人生道理、樹立嘅榜樣都對我有好大影響。仲有一班好朋友同學，大家一齊蒲 Lab 通宵趕功課嘅日子，都係不可取締嘅回憶。 我無後悔，亦慶幸自己有呢段大學生活嘅經歷。
除左中學畢業就報名同讀埋大學呢兩條路，其實仲有好多唔同嘅路，例如中學/大學畢業投身社會工作、大學未畢業就入到 Cadet Pilot Program 選擇 Defer 學業、事業已經有一定基礎先發現對飛行有興趣想轉行等等。每個人都有自己嘅路要行，條條大路通羅馬，邊條路啱你呢？就只有你自己先知，甚至可能要行過先知。如果想再傾下，歡迎聯絡我啊 :)
No comments
Post a Comment