kiss me before flight

Wednesday, September 19, 2018

Melbourne 墨爾本 / Great Ocean Road 大洋路﹒十二門徒石﹒一日遊


今次係 Melbourne 有一整日時間,決定去遠少少嘅 Great Ocean Road 大洋路,尋找 Melbourne 出名嘅十二門徒石 Twelve Apostles。由 Melbourne 市區出發到目的地車程要三、四個鐘,如果有兩日時間慢慢揸車 Road Trip 應該會好正。但奈何我地只得一日時間,唔想搞到自己太攰,就選擇參加 Day Tour。

上網搵過幾個 Day Tour,大部份 Local Day Tour 要$700-$800,但係 KKDay 只係二百幾。比較過行程其實差不多,評價都幾好,就決定揀 KKDay。朝早八點係唐人街集合,當日有二十人,點齊名就出發。係 Melbourne CBD 內導遊兼司機 Gavin 有簡單介紹 Mebourne 歷史、景點、食肆推介等,離開市中心範圍就俾大家靜靜地補一補眠。覺得 Gavin 幾好嘅係全程都係適當時候介紹景點,唔會不斷講廢話。呢個係普通話團,不過 Gavin 係廣州人識講廣東話。

去到 Great Ocean Road 牌前係 Anglesea 會落一落車,導遊就去入油。係小巴上瞓左成個鐘,落車行下好醒神!之後就繼續出發踏上大洋路呢個旅途。有個到此一遊必影嘅景點就係 Great Ocean Road 牌,好多人都堆係牌下面影相,但其實離遠少少兩個應該係預設好嘅影相位無乜人爭。之後就會經過  Lorne 去 Apollo Bay 食午餐。呢段路景色都好靚,不過可以落車影相嘅時間都好短,主要都係俾大家鬆下筋骨。
















係 Apollo Bay 有一個鐘 Lunch Time,餐廳選擇唔多,有中式、日式同西式。用餐完畢可以去附近沙灘影下相。夠鐘就起行去十二門徒石 Twelve Apostles,車程大約一個半鐘,又係時候補眠。大約到達前十分鐘,導遊開咪介紹十二門徒嘅由來,又講返因為風吹同海水沖擊,現時只係淨返七座石。要睇呢七座石可以去觀景台或者乘搭直升機,我地當然就選擇直升機呢個 Choice 啦!

十五分鐘嘅 Scenic Flight 收費 AUD 145,另加 AUD 45 會有影片儲存係一隻直升機型 USB 帶走。因為避開左人潮,我地好快就可以上機。一架直升機可以乘坐七位乘客,好好彩我地坐到前座有最開揚嘅景!有得坐直升機已經好開心,飛到上去睇到好靚嘅景更加開心!機師會保持五百尺高度沿住海岸飛,同時會介紹唔同石嘅特點同歷史。其中有一舊真係好似 Cheese Cake!不過機師有好重嘅澳洲口音,而且講得好快好快,要聽得切聽得明係有少少難度。飛完十五分鐘仲有少少時間,我地就去埋觀景台行下。真心覺得山長水遠黎到,人唔太多的話就飛一轉直升機 Scenic Flight 啦!個景真係好壯觀好唔同!
























之後去埋最後一個景點 Loch Ard Gorge,係度曾經有一架英國移民船遇難,最後只有兩個人生還,由沙灘徒手爬上崖再被人救起。依家有樓梯唔再需要徒手爬上爬落,不過行完都喘喘地氣。




   





去完最後一個景點就回程,返到市中心起經差不多八點,即係成個 Trip 去左十二個鐘。如果自駕遊的話真係會好攰,不過跟 Day Tour 有好多時間補眠,精神到失眠。如果只有一日時間,呢個 Day Tour 係一個好好嘅選擇。
SHARE:

No comments

Post a Comment

Blogger Template Created by pipdig