kiss me before flight

Friday, September 28, 2018

雖然我不是 KOL


雖然由幼稚園到大學一直都係教會學校讀書,但始終都係未成為教徒,最多都係臨考試前唸下天主經抱抱天主腳。但當得知比利時 Bruges 有間 Basilica of the Holy Blood 聖血教堂保存住耶穌嘅血,我想去朝一朝聖。


成個教堂都可以影相,唯獨聖血遺物唔影得,借 Visit Bruges 嘅圖參考下。係見到支聖血遺物嘅時候,突然間有一種好莫名嘅感動:世上有一個人,影嚮力之大係無論教徒與否,世界各地都總有人細細個就聽過你個名,仲要真真正正千古留名。其實當時耶穌本人有無諗過自己會有咁大影嚮力呢?

我相信每個人無論幾不經意嘅行為同決定,都會影嚮到身邊嘅人同事。曾經係制服團體做過小小的 Leader,印象當時對小朋友隊員都無刻意去灌輸咩意識同知識,始終當時都只係十幾歲𡃁妹,自己都少不更事。長大後突然有一日,曾經嘅小朋友隊員留言同我講:「多謝你,你以前教過我嘅野,我一世都會記得。」呢番說話睇到我眼濕濕好感動,之但係,我真係記唔起到底我教過佢乜。同時我又醒覺,原來就算我唔係權威名人 KOL,甚至只係一個十幾歲嘅𡃁妹,一言一行其實都影嚮到身邊嘅人。

幾年前成功考入 Cadet Program 當然可喜可賀,但我無諗到原來呢件事 inspire 到身邊唔止一位朋友醒覺做機師原來並非遙不可及,重新出發去追尋佢地嘅飛行夢。

雖則自問無本事做到耶穌般千古留名,但我希望我僅有嘅影嚮力,可以係身邊人嘅生命中帶黎少少正面嘅改變。如果我曾經影嚮過你,話俾我聽呀!希望係好事 :P
SHARE:

No comments

Post a Comment

Blogger Template Created by pipdig