kiss me before flight

Saturday, January 20, 2018

飛機「冷」知識


搭飛機遇上風雪天,航班延誤少不免。但其實就算未凍到落雪,低溫都可以令到航班有延誤,因為飛機其實好怕凍架!當天氣夠凍夠濕,機身表面就可 能會結冰,對飛行造成影響。飛機可以飛上天,主要係因為空氣流過機翼時產生升力(Lift),承托飛機的重量。但當飛機表面積雪、結冰、結霜,會令原本光滑的機身表面變得粗糙,擾亂氣流,減少機翼可製造的升力。除此之外,仲會增加阻力、重量同影響控制性能,影響飛行安全。所以當發現飛機結冰,就要做除冰(De-icing)甚至防冰(Anti-icing)的程序幫飛機解凍。


跟據天氣同結冰情況,飛機會噴上相應的除/防冰液,溶化機身上的冰雪同於有限時間內防止機身結冰積雪。配合機場設備限制,程序有時會係閘口完成,有時需要滑行到指定地方進行。所以就算飛機開始滑行都唔好咁開心住,可能只係滑行緊去指定 Deicing Bay 。

天 氣情況配合不同成分的除/防冰液都會影響機身受保護的時間,機師會留意住相應的 Holdover Time(HOT)。超過 Holdover Time 的話就不能夠保證機身表面乾淨無冰,所以如果係 Holdover Time 完結前未能起飛,就要重新進行除/防冰的程序,可能需要重新排過隊。


其實睇飛機做 Deice 都幾得意架,與其係飛機上面呆等,下次遇上 Deice 不如開機上的 Camera view 睇下樣做 Deice 啦!
SHARE:

No comments

Post a Comment

Blogger Template Created by pipdig