Melbourne 墨爾本 / St. Kilda Beach 尋找小企鵝


今次返工去 Melbourne,男朋友臨時決定一齊過去,其實無 Plan 過都唔知做咩好,諗住去沙灘行下。ISM 知道我地諗住去 St. Kilda 就話俾我地知有得睇免費企鵝!嘩,最鍾意睇企鵝搖下搖下咁行!上網睇下介紹原來係要等天黑佢地游返岸返屋企,所以就決定6點半左右去到食個飯行下,等佢地打道回府。



由 CBD 出發大約半個鐘就到 St. Kilda Beach,可以搭 Tram 12 或者 96。我地搭 Tram 12 直接到總站落車。藍天白雲配無敵海景,不過係極極極大風。大概係因為好大風,好多人係度玩 Kitesurfing。



天未黑但肚已餓,揀左 Repulica 食晚餐。雖然好大風但我依然堅持坐戶外,因為個景真係一流。點左 Steak, Short Rib 同八爪魚,份量比想像中細但好好味!眨下眼已經用餐完畢,就行下沙灘,其實同 Adelaide 的 Glenelg 有點似。





行行下就黎到 St. Kilda Pier,已經有多人坐定定等企鵝返屋企啦。企鵝大人未返屋企,大家就係石縫間睇企鵝 BB。到開始天黑大家都聚精匯神留意海面動靜。不下一次海面有動物游向海岸大家都好緊張,結果係同一隻巨型 Rat,大家都發出嫌棄的聲音。其實佢都好慘,明明大家都住係度,點解企鵝受盡寵愛,但佢就要俾人嫌棄?



其實在場企鵝數量唔算多,但交通方便而且免費,都唔要求得咁多。最終都見到一隻企鵝極速游上岸衝入石縫。到我地要歸家離開之時,係路上又遇到兩隻係 Jetty 另一邊想過路返屋企。但遊人紛紛圍住佢地影相,無路可行。現場義工就叫大家讓條路俾佢地,不過大家顧住影相其實都讓唔到一條路出黎。有人甚至開左閃光燈影相,義工就非常緊張地行過去勸喻對方唔好用閃光燈,因為會閃盲企鵝,義工們都只會用落左紅色 Filter 的電筒照企鵝方便遊人觀賞。不過呢個動作就嚇親企鵝一個箭步調頭走。見到企鵝咁耐都返唔到屋企,我地決定都係離開俾條生路佢地行。


今轉 Flight 有人陪我返工,飲飲食食行下沙灘睇企鵝,真係開心到不得了 :)